Sarju online

  २१ असार,झापा भद्रपुरमा पौडी खेल्ने क्रममा डुबेर एक बालकको ज्यान गएको छ। भद्रपुर नगरपालिका–३ स्थित देउनियाँ खोला र मेची खोलाको दोभानमा आज दिउँसो करिब ३ बजे घटना भएको हो। भद्रपुर–२, महारानी चोकका अर्जुन लिम्बूका १२ वर्षीय छोरा अर्पण लिम्बू साथीहरूसँग पौडी खेल्ने क्रममा पानीमा डुबेर बेपत्ता भएका थिए। जानकारी प्राप्त भएपछि प्रहरी चौकी किचकवधबाट खटिएको टोलीले स्थानीयको सहयोगमा खोजी सुरु गरेको थियो। खोजीका क्रममा उनलाई सोही स्थानमा मृत अवस्थामा फेला पारिएको प्रहरी स्रोतले जनाएको छ। घटनाबारे थप अनुसन्धान भइरहेको जनाइएको छ।

२१ असार,झापा बिर्तामोड–३ मा अवस्थित ऐतिहासिक तथा धार्मिक स्थल बिराटपोखरी क्षेत्रको हरियाली प्रवर्धनका लागि फलफूलका बिरुवा रोप्ने अभियान निरन्तर चलिरहेको छ। श्री बिराटपोखरी बहुउद्देश्यीय विकास समितिका सचिव जगन्नाथ भट्टराईका अनुसार हालसम्म विभिन्न संघ–संस्थाको सहयोगमा बृक्षारोपण कार्य भइरहेको छ भने आगामी दिनमा थप प्रभावकारी र परिणाममुखी ढंगले काम अघि बढाइनेछ। आगामी फागुन महिनादेखि ठूला रुखका हाँगा व्यवस्थापन, फूलका बगैंचाको सौन्दर्यकरण तथा झारपात नियन्त्रणलाई प्राथमिकतामा राखिने बताइएको छ। त्यसका लागि झार काट्ने विद्युतीय मेसिनसमेत खरिद भइसकेको छ। पोखरी क्षेत्रको उत्तर र पूर्व भागमा भौतिक संरचना निर्माण नगरिकन हरियाली संरक्षण र बगैंचाको दीर्घकालीन व्यवस्थापनलाई प्राथमिकता दिइएको सचिव भट्टराईले जानकारी दिए।

  १८ असार,झापा सामाजिक उत्तरदायित्वअन्तर्गत सिद्धार्थ बैंक लिमिटेड, बिर्तामोड शाखाले बिर्तामोड उद्योग वाणिज्य संघलाई ४५ थान डस्टविन प्रदान गरेको छ। बैंकका कोशी प्रदेश प्रमुख सुवास श्रेष्ठले डस्टविन संघका अध्यक्ष राजु न्यौपानेलाई एक कार्यक्रमबीच हस्तान्तरण गरेका हुन्। संघका अध्यक्ष न्यौपानेले डस्टविनले नगरको स्वच्छता कायम गर्न महत्वपूर्ण भूमिका खेल्ने विश्वास व्यक्त गरे। बिर्तामोडका विभिन्न स्थानहरूमा ती डस्टविनहरू राखिने जानकारी दिँदै उनले आगामी दिनमा पनि बैंकबाट यस्तै सहयोगको अपेक्षा गरिएको बताए। कार्यक्रममा बोल्दै बैंकका प्रदेश प्रमुख श्रेष्ठले संस्थागत सामाजिक उत्तरदायित्वअन्तर्गत बिर्तामोड उद्योग वाणिज्य संघले सञ्चालन गर्दै आएको सरसफाई अभियानमा साथ दिन डस्टविन प्रदान गरिएको बताए। कार्यक्रमको सहजीकरण महासचिव कुशल खतिवडाले गरेका थिए। डस्टविन हस्तान्तरणमार्फत वातावरण स्वच्छ राख्न योगदान पु¥याएको भन्दै बिर्तामोड उद्योग वाणिज्य संघले सिद्धार्थ बैंकलाई कदरपत्र प्रदान गरेर सम्मानसमेत गरेको थियो।