इटहरीमा सम्पन्न भयो आईआईसी इनोभेक्स ३.०

भदौ ७,ईटहरी

 नेपालकै सबैभन्दा ठूलो विद्यार्थी–नेतृत्वको नवप्रवर्तन र उद्यमशीलता महोत्सव ‘आईआईसी इनोभेक्स ३.०’ तीन दिने यात्रापछि इटहरी इन्टरनेशनल कलेजमा सफलतापूर्वक सम्पन्न भएको छ। साउन ४ देखि ६ गतेसम्म चलेको महोत्सवमा देशभरका १६ कलेजका विद्यार्थीले सहभागिता जनाएका थिए।

‘फाइनान्सियल फीट’, ‘लिगल सिम्पोजियम’, ‘मार्केटिङ माभेन’ र ‘सिइओ क्रोनिकल्स’ जस्ता कार्यक्रममार्फत विद्यार्थीहरूले शैक्षिक ज्ञानलाई व्यवहारिक क्षेत्रमा उतार्ने अवसर पाए। निर्णायक र उद्योग विज्ञलाई प्रभावित पार्ने प्रस्तुति गर्दै विराटनगर इन्टरनेशनल कलेज विजेता, एसीई इन्स्टिच्युट अफ म्यानेजमेन्ट पहिलो रनरअप र हेराल्ड कलेज दोस्रो रनरअप बने।

महोत्सवमा २०० भन्दा बढी विद्यार्थीको सहभागिता रहेको थियो। उद्योग विज्ञ, शिक्षाविद् र मिडियाको उल्लेखनीय चासोले यसलाई राष्ट्रिय स्तरको महत्त्वपूर्ण कार्यक्रममा परिणत गरेको आयोजकले जनाएका छन्।

समापन समारोहमा आयोजक टोलीले सहभागी कलेज, मार्गदर्शक र साझेदारलाई धन्यवाद दिँदै आगामी वर्ष ‘आईआईसी इनोभेक्स ४.०’ अझ प्रभावकारी ढंगले आयोजना गर्ने घोषणा गरेको छ।